Futbollisti më i mirë për vitin 2009, Mentor Zhdrella, pas përfundimit të kampionatit do të provohet në një skuadër elitare të kampionatit kroat. Këtë lajm e ka konfirmuar mesfushori, i cili është i bindur se ka cilësi për t’u përshtatur në futbollin e Kroacisë.

“Është e vërtetë se jam në kontakt me një skuadër të Ligës së Parë të Kroacisë. Atje, pas përfundimit të kampionatit, do të shkoj për prova. Mendoj se kam cilësi t’i kaloj provat dhe të luaj në një kampionat të fortë siç është ai i Kroacisë”, ka thënë Mentor Zhdrella.

Kapiteni i skuadrës nga Merdara për shkak të lëndimit ka munguar në takimin e parë të stinorit pranveror. Ai dje (e martë) ka filluar të stërvitet, dhe shpreson që shumë shpejt do të jetë në dispozicion të trajnerit Luan Prekazi.

“Më ka mbetur merak që nuk luajta në takimin e parë. Skuadra luajti mirë, por fati na mungoj. Sot do të filloj të stërvitem dhe besoj se shumë shpejt do të jam i gatshëm t’i ndihmoj skuadrës”, ka shtuar ai.

Mesfushori, që është kapiten dhe lider i skuadrës së Hysit, në stinorin vjeshtor ka shënuar nëntë gola.

Veton Zymberi