Ikona e Besës së Pejës, Haxhi Zeka, ka thënë se ndihet i lumtur me fitoren e skuadrës së tij në Kastriot ndaj KEK-ut.

Pejanët të mërkurën që e lamë pas mundën “elektricistët” 1-0, në kuadër të Javës së 14 të Raiffeisen Superligës së Kosovës në Futboll. Besa me këtë trepikësh tashmë gjendet në vendin e tretë të renditjes tabelore, me 23 pikë të grumbulluara, katër pikë më pak se Hysi. Sipas Zekës, skuadra e tij me suksesin e arritur ndaj KEK-ut ka hyrë seriozisht në garën për titull të kampiones.

“Të them drejtën fitorja ndaj KEK-ut ka rritur në masë të madhe motivin në radhët tona. Ballafaqimi me KEK-un ka qenë një lojë e mirë, për faktin se skuadra nga Kastrioti, ani pse humbi takimin me ne, ka shfaqur futboll të mirë dhe se, realisht ne kemi fituar falë fatit sportiv”, ka thënë Zeka.

“Tashmë me trepikëshin e fituar në takimin e fundit, ne kemi bërë një hap të madh drejt kreut të tabelës, duke u futur seriozisht në valle për ta rikthyer titullin në Pejë”, ka thënë Zeka, duke shtuar ndërkohë se skuadrës në pjesën e dytë të garave i duhen dy-ose tri përforcime.

“Besoj se forma e mirë e skuadrës sonë do të vazhdojë edhe në takimet e radhës. Presim ndonjë gabim nga skuadra e Hysit, në mënyrë që ne t’ia marrim vendin e parë, e që stinorin vjeshtor ta përfundojmë në krye të tabelës. Skuadrës i duhen dy-ose tri përforcime për pjesën e dytë të garave, për faktin se pjesa pranverore do të jetë edhe më e ‘nxehtë’, veçmas gara për titull të kampiones. Besoj se ne mund ta arrijmë titullin e kampiones”, ka përfunduar Zeka.

Fatmir Bytyçi