Drejtuesit e Klubit të Futbollit Ballkani nga Theranda kanë vendosur të tërhiqen nga garat, pasi Komiteti Ekzekutiv i Federatës së Futbollit të Kosovës (FFK) ka marrë vendim që takimi në mes të Lepencit dhe Ballkanit të regjistrohet me rezultat zyrtar 3-0.

Këtë lajm e ka bërë të ditur drejtori i KF Ballkanit, Besim Kuqi, duke shtuar: “Ne s’mund ta kuptojmë atë vendim. Shkalla e dytë dhe Komiteti Ekzekutiv kanë marrë vendime të kundërta. Federata po bën padrejtësi të mëdha ndaj nesh. Këso padrejtësi bëri edhe një vit më parë”.

Drejtori i skuadrës nga Theranda ka bërë me dije se mundësia e vetme që Ballkani të rikthehet është anulimi i vendimit nga KE i FFK-së.

“Komiteti Ekzekutiv e ka marrë vendimin, kurse ne s’e kemi ndërmend të rikthehemi. Mundësia e vetme që të rikthehemi është nëse ky vendim anulohet”, ka shtuar Kuçi.

Skuadra e Ballkanit, që bënë gara në Ligën e Parë të Futbollit të Kosovës, e udhëhequr nga trajneri Adil Vokrri, sezonin vjeshtor e mbylli si lidere me 38 pikë të tubuara.

Veton Zymberi