Nuk ka më bukur se sa nje fitore ndaj ekipit pretendent në grup. Pas Vllaznisë e pëson edhe Flamurtari në qytezen simpatike. Kamza ka bërë një start të mirë në ndeshjet e para në grupe, të vlefshme për Kupën e Shqipërisë. Ajo ka mundur nënkampionen e Shqipërisë, skuadrën e Flamurtarit të Vlorës me rezultatin 1-0. Me këtë rezultat, ka marrë edhe tre pikët e para në grupin B, ku bëjne pjesë ekipet e Kamzës, Flamurtarit, Teutes dhe Pogradecit.

E mërkurë, 19.10.2011, ora 14.00, në stadiumin “Dajti”,

Shikues: 2000

Koha e mirë me diell dhe e ngrohtë, temperature 20 0 C. Terreni mjaft i mirë.

Kamza-Flamurtari 1-0

Kamza: Bytyçi, Ndreka, Likmeta, Hallaçi, Ardit Beqiri, Belçev, Mici, Karapici (74` Gega), Pema, Manuka (82` Qata), Dalipi (69` E. Tafaj)

Trajner: Ernest Gjoka

Flamurtari: Spaho, Begaj, Liçaj, Shehaj, Xhelili, Orjad Beqiri, Arbëri, Telushi, Brkiç (74` Hysa), Kuqi, Shtubina

Trajner: Edmond Lutaj

Gjyqtarë: Sokol Çekaj (Lezhë), Klodian Vargu (Lezhë), Paulin Simoni (Lezhë), Rigers Pjetrushi (Lezhë)

I deleguar i FSHF-së: Besnik Çela (Tiranë)

Shënues: 9` Ndreka

Kornet: 6 / 4

Kartona të verdhë: 40` Shehaj (Flamurtari), 42` Ardit Beqiri (Kamza), 52` Brkiç (Flamurtari), 58` Hallaçi (Kamza), 75` Manuka (Kamza)

Kronika e lojës:

Topin e parë nga mesi I fushës e kanë shkelmuar vëndasit, ndërsa miqtë kanë zgjedhur portën. Loja ka nisur e bukur me ritëm dhe nivel të lartë, me sulme nga të dyja krahët. Nëpese minutat e para janë dy raste të pastra për shënim nga ana e kamzalinjve, por Pema dhe Dalipi nuk mundën dot të shfrytëzonin. Në minutën e 9-të, vjen dhe goli i vendasve. Manuka kroson nga korneja dhe aty Ndreka që ka ardhur në ndihmë të sulmit,ka goditur me kokë, duke mposhtur portierin Spaho dhe 1-0 për Kamzën. Pas tre minutash është përsëri Pema, që ka shpërthyer nga e majta dhe ka gjuajtur shtrirazi e topi ka përfunduar në shtyllën pingule duke u kthyer përsëri në lojë e më pas ka pastruar zonën mbrojtja vlonjate. Në minutën e 21`-të, Brkiç gjuan një goditje dënimi nga rreth 25-m, ballë për ballë me portierin Bytyçi, e topi ka prekur shtyllën, është rikthyer në lojë e Telushi brenda zonës, ka goditur me kokë, e portiere Bytyçi tregon vlerat e tij duke bërë një pritje të bukur. Në minutën e 30-të, goditje dënimi për Kamzën, ekzekuton Dalipi rreth 21-m, larg portës mike e topi kalon ngjitur me traversën, jashtë. Në të 34-rtën minutë Pema nga e djathta e sulmit vëndas, ka shpërthyer në zonë, ka gjuajtur në ecje e sipër shtriraz e topi kalon tërë pasqyrën e portës e del jashtë, ngjitur me shtyllën pingule. Më pas vijnë dy kartona të verdhë, nga një për secilin ekip. Me rezultatin 1-0 për vëndasit, lojtarët kanë hyrë në dhomat e zhveshjeve.

Pjesa e dytë ka nisur pak më e mirë për miqtë, të cilët kanë arritur të bëjnë presing në kërkimit të golit të barazimit, por mbrojtja e kamzalinjve me në krye Ndrekën, që pa dyshim ka qënë lojtari më i mirë në fushë, Beqirin, Hallaçin e Likmetën, nuk ka lejuar që sulmuesit vlonjat Shtubina, Kuqi e Brkiç ti afroheshin portës së Bytyçit. Nga rastet e kësaj pjese loje mund të përmendim minutën e 47-te,, Karapici ka future një kros në portë e Dalipi, me kokë e topi del jashtë. Në minutën e 56-të, kemi goditje dënimi ballëpërballë me portierin Bytyçi, rreth 17-m larg, ka gjuajtur Brkiç e ka shkëlqyer pritja e bukur e Bytyçit. Tashmë kemi një presing nga ana e Flamurtarit për gati pese minuta, ndërmjet sulmuesve vlonjatë e mbrojtësve vëndas. Në të 18-tën, minutë vjen edhe rasti i vetëm i Flamurtarit , ku gjuan Begaj nga 25-m, dhe topi shkon ngjitur me shtyllën trasversale. Në minutën e 67-të, Brkiç shpërthen në zonën e Kamzes dhe në momentin që bëhej gati për të goditur në portë, është këmba e Hallaçit që ka hequr topin. Në minutën e 69-te, vjen dhe ndrimi i parë i vëndasve, del kapiteni i skuadrës Klevis Dalipi dhe futet Enri Tafaj. Në të 79-tën minutë është një kundërsulm i shpejtë i Gegës që ka shpërthyer duke u ikur dy mbrojtësve vlonjatë, Liçajt e Arbërit ka vonuar në dhënien e topit në drejtim të Manukës, ka kuptuar portieri Spaho që ka dalë para tij e ka pastruar zonën. Edhe më pas kane qënë Kamzalinjtë që kanë rrezikuar disa herë. Edhe pse pati tre minuta shtesë, lojtarët e Kamzës jo vetëm që nuk u kthyen në mbrojtje, por sulmuan në kërkim të golit të dytë. Përefundimisht me rezultatin 1-0, skuadra e Kamzës, ka marrë 3-pikë, duke e renditur si pretendente për të kaluar grupin.

Deklaratat e trajnereve pas ndeshjes:

Ernest Gjoka, trajner i Kamzës: - “Normalisht që jemi të kënaqur me këtë fitore, e cila e motivon skuadrën me moral të lartë, pasi ka mundur në shtëpinë e saj dy ekipet më të mira të Shqipërisë, Vllazninë dhe Flamurtarin. Treguam nivel të lartë loje e tani çdo gjë për ne ka kaluar. Mëndja jonë tani është te ndeshja e rradhës për kampionat ndaj Tomorit”.

Edmond Lutaj, trajner i Flamurtarit: - “Ndeshja ishte mjaft e vështirë për ne. Kamza siç dihet ka lojtarë superlige dhe ne e kishim vlerësuar në maksimum. Gjatë pjesë së parë skuadra nuk pati lidhjet ndërmjet reparteve, ndërsa gjatë pjesës së dytë, reaguam duke krijuar presion. Kamza fitoi me meritë.”