Mesfushori i kombëtares shqiptare Odise Roshi ka qenë në qendër të mediave gjermane ditën e djeshme, për një ngjarje të rëndë të ndodhur në miqësoren e disa ditëve më parë mes Këlnit dhe Hanover 96. Takimi i zhvilluar në Portimao të Portugalisë, ku dy skuadrat ndodhen për fazën përgatitore të dimrit, është shoqëruar me një përplasje mes lojtarit shqiptar dhe atij të Hanoverit Mortiz Stopelkamp.

Lojtari i kombetares Shqiptare e ka pështyrë në fytyrë në minutën e 70-të, duke shkaktuar një incident aspak të këndshëm, për më tepër që miqësorja ndiqej nga 150 shikues. Ngjarjes i janë dhënë përmasa të jashtëzakonshme në shtypin gjerman, madje “Bild” e ka krahasuar atë me pështyrjen që Frenk Rajkard bëri ndaj Rudi Fëler në ndeshjen e Botërorit 1990 mes Gjermanisë e Holandës. Mes Roshit dhe futbollistit gjerman për pak sa nuk ka plasur sherri, por futja e lojtarëve të tjerë nuk e ka lejuar një gjë të tillë.

“Ai më pështyu, në atë moment doja t’i thyeja hundën”, ka deklaruar pas ndeshjes 25-vjeçari gjerman Stopelkamp. Ndërkohë, arbitri i ndeshjes nuk e ka parë fare këtë moment dhe Roshi nuk është ndëshkuar me asnjë karton. Megjithatë, ngjarja është parë nga gazetarët e pranishëm në Portugali dhe dje ajo ka qenë një prej lajmeve kryesore në mediat gjermane.

Trajneri i Hanoverit Mirko Slomka, duke folur për këtë moment, ka dënuar gjestin : “Ishte një skenë shumë e shëmtuar”, deklaroi Slomka.

Në minutën e 70-të të takimit mes Hanover 96 dhe Këlnit, të zhvilluar në Portimao të Portugalisë, mesfushori i kombëtares shqiptare Odise Roshi ka pësuar një ndërhyrje të rëndë në këmbën e majtë nga ana e futbollistit gjerman Mortiz Stopelkamp. 20-vjeçari shqiptar është nxehur menjëherë dhe sipas mediave gjermane, ai është ngritur dhe ka pështyrë lojtarin e Hanoverit. Skena nuk u pa nga arbitri, ndërsa futja e lojtarëve të tjerë parandaloi që situata të degjeneronte. Stopelkamp më pas ka thënë se ishte gati t’i thyente hundën lojtarit shqiptar, nga zemërimi.

Në krah të tij doli edhe trajneri Slomka, që deklaroi se ishte një skenë shumë e shëmtuar, ndërsa ngjarja është pasqyruar nga një pjesë e madhe e mediave gjermane. “Bild” e ka quajtur atë një skandal, duke e krahasuar me përplasjen Rajkard- Fëler, ndërsa “Goal.com” tregon për një sulm të çuditshëm. “Roshi pështyn Stopelkamp”, është titulli i “RTL Online”, që gjithashtu pasqyron momentin negativ të ndeshjes. Në fund, Hanoveri e Këlni kanë barazuar 1-1 mes tyre. Në minutën e 44- t, Kristian Klemens kaloi në avantazh Këlnin, ndërsa 20 minuta nga nisja e pjesës së dytë, Jan Shlaudraf barazoi shifrat me një penallti.