Shqipëria është bërë organizatore e një kompeticioni të veçantë, ose më saktë Ambasada Amerikane në Tiranë, e cila hapi zyrtarisht turneun e quajtur “Kampionati Rajonal i Futbollit të Ambasadave Amerikane”, ku marrin pjesë përfaqësues nga 9 seli diplomatike të Uashingtonit në Ballkan. Evenimenti që këtë vit po zhvillohet në kryeqytetin shqiptar, u mirëprit nga ambasadori amerikan në Tiranë, Aleksandër Arvizu. Numri 1 i selisë diplomatike në vendin tonë, prezantoi ekipet përfaqësuese nga Beogradi, Sofia, Prishtina, Ljubjana, Shkupi, Podgorica, Selaniku, Bratislava dhe Tirana.

Në këtë eveniment, Tirana përfaqësohet me dy ekipe, A dhe B, që janë në dy grupe të ndryshme. Ambasada Amerikane në Tiranë bën me dije se gjysmëfinalet dhe finalja do të zhvillohen në datën 26 maj në kompleksin “Fari” te Liqeni Artificial i Tiranës. Ky është viti i shtatë që misionet diplomatike në rajon zhvillojnë një turne të këtij lloji për të mbështetur iniciativat sportive në vendet ku ata punojnë prej vitesh.