Xherdan Shaqiri pati një paraqitje pozitive në sezonin e parë të sezonit. Mesfushori kosovar nuk ishte prezent në fushë në ndeshjet e rëndësishme dhe vendimtare, por në përgjithësi pati një minutazh me të cilin nuk mund të ankohet. Përfaqësuesi zviceran zhvilloi 38 ndeshje me gjigantin bavarez sezonin e kaluar, duke i fituar tre trofe, përfshirë këtu Ligën e Kampionëve, Bundesligën dhe Kupën e Gjermanisë. “Mund të jem i kënaqur me minutazhin që mu dha”, ka thënë 21 vjeçari për uebfaqen zvicerane spox.ch.

Gjatë verës në Allianz Arena do të arrijë edhe mesfushori Mario Gotze, gjë që do të bëjë që konkurrenca në mesfushë të shtohet. Por, futbollisti gjilanas nuk e ka aspak problem konkurrencën. “Nuk ia kam frikën askujt. Kur kam nënshkruar me Bayernin, aty ishin Ribery, Robben, Muller e Kroos. Gotze është një lojtar i madh, do ta përmirësojë ekipin tejmase. Unë mund të luaj kudo që shtrohet nevoja për mua, edhe pse e pranoj se do të preferoja të luaj në krahun e djathtë”, shtoi Shaqiri, i cili e pranon se sezonin tjetër synon të luajë më shumë.

Ky i fundit e pranon se muajt e parë në Munich ishin të vështirë, pasi e kishte nostalgjinë e shtëpisë. Atij i mungonte familja, pasi nuk ishte mësuar të jetonte larg tyre. Por, me të shkoi të jetonte vëllai, kurse familjarët tjerë e vizitonin kohë pas kohe.

Ndërkohë, selektori i Zvicrës, Ottmar Hitzfeld e ka lavdëruar futbollistin kosovar, i cili realizoi tetë gola në sezonin e parë në Allianz Arena. “Ajo çka ka bërë Xherdani në sezonin e parë në Bayern, meriton të përshëndetet. Të luante në 38 ndeshje, është evidente se nuk është pak”, ka thënë trajneri gjerman, i cili beson se Shaqiri do të përfitojë nga ardhja e Pep Guardiolës në Bayern. “Shaqiri do të përfitojë. Guardiola ishte në Barcelonë dhe shtati i shkurtër nuk është problem për të, pasi te Barça kishte lojtarë të tillë si Xavi, Iniesta apo Messi. Xherdani ka gjithçka që Guardiola do. Të gjithë lojtarët tek Guardiola do ta nisin nga zero”, shtoi ai.

Ndërkaq, ish trajneri i Shaqirit tek Baseli, Heiko Vogel thotë se Xherdani nuk është një befasi dhe pret që të qëndrojë në një periudhë afatgjate në Bayern. Ai mendon se 21 vjeçari do të arrijë shumë në karrierë, pasi i njeh mirë kualitetet e tij.